O Colexio Oficial de Enxeñeiros Agrícolas de Ourense vén de iniciar oficialmente o seu proceso electoral, que culminará o próximo 20 de decembro, data na que se celebrarán as eleccións colexiais destinadas á renovación dos órganos de goberno da entidade.
O pasado xoves, a sede do Colexio acolleu a reunión de constitución da Xunta Electoral e a formalización dos Censores de Contas, un acto que marcou o punto de partida dun proceso pensado para garantir a transparencia, a participación e o bo funcionamento democrático da institución.
A sesión, celebrada ás 17:30 horas na sala de xuntas, desenvolveuse baixo a presidencia de Manuel Rojo e coa secretaría de Miguel Ángel Viso, ambos en representación da Xunta de Goberno conforme ao calendario aprobado. Durante o encontro procedeuse á elección dos cargos de presidente, secretario e vogal da Xunta Electoral entre os membros titulares designados por sorteo público na Asemblea Xeral Ordinaria do pasado 3 de outubro. Os colexiados presentes aceptaron os seus cargos e tomaron posesión nun ambiente de compromiso, colaboración e sentido institucional.
No marco deste proceso, o presidente do Colexio, Manuel Rojo López, anunciou con serenidade e sentido institucional o inicio da etapa electoral, lembrando que o Colexio entra agora nun momento clave, no que o 20 de decembro marcará unha data importante para o colectivo e para o futuro da profesión. Subliñou tamén que a institución debe permanecer sempre rodeada de profesionais en cada momento e en cada circunstancia, porque só así se garante a continuidade, o rigor e o servizo á sociedade.
Despois de oito anos de dedicación e entrega á fronte do Colexio, Manuel Rojo afirmou, convencido de que é o momento de dar paso a outro compañeiro. Considera que a renovación é necesaria e positiva, unha oportunidade para incorporar novas ideas, ilusión e enerxía a un proxecto común que debe seguir crecendo con espírito colectivo.
O presidente salientou ademais que este proceso non é un mero trámite, senón unha oportunidade para renovar a confianza nun grupo de profesionais que traballan pola terra, pola calidade e polo futuro sostible de Galicia. Con estas palabras, puxo en valor o espírito de servizo, compromiso e responsabilidade que caracteriza á profesión e ao propio Colexio.
“O vindeiro 20 de decembro será, unha vez máis, unha mostra de que o diálogo, a responsabilidade e o respecto polos estatutos son o camiño para seguir avanzando como profesión e como comunidade, mantendo vivo o compromiso que une a todos os enxeñeiros agrícolas de Ourense”, aseguran dende esta entidade colexial.