O Eixo Atlántico presentou a “Estratexia para a mitigación e adaptación ao cambio climático: metabolismo urbano e biodiversidade”, unha folla de ruta con accións concretas para que os 40 membros da entidade sexan cidades máis sostibles e eficientes.
Con este estudo, o Eixo Atlántico reafirma o seu compromiso cos Obxectivos de Desenvolvemento Sostible e o Pacto Verde Europeo. Nun momento no que o quecemento global xa superou os 1,5 ºC, é importante actuar dende o local. Coordinado polo ex director da Axencia de Ecoloxía Urbana de Barcelona e experto en sustentabilidade urbana, Francesc Cárdenas, o informe propón transformar o modelo de cidade apostando por unha xestión máis eficiente dos recursos, a enerxía, a auga e os residuos. O documento centra a súa estratexia en dous conceptos: o metabolismo urbano —como as cidades consumen e xestionan os seus recursos— e a biodiversidade urbana, fundamental para mellorar a resiliencia climática e a calidade de vida.
O informe inclúe 112 accións, que van dende a redución do desperdicio alimentario ata o impulso da economía circular, a agricultura urbana, a recuperación de espazos verdes e a educación ambiental.
Este informe forma parte dun proceso de traballo desenvolto entre 2022 e 2024, que deu lugar a tres documentos estratéxicos:
- 2022: Plan de acción para a descarbonización dos municipios do Eixo Atlántico
- 2023: Estratexia para a transición enerxética nos municipios do Eixo Atlántico
- 2024: Estratexia para a mitigación e adaptación ao cambio climático
Ao longo destes tres anos, as cidades do Eixo Atlántico aportaron 505 fichas de boas prácticas e experiencias, que se complementan con 85 fichas internacionais. Actualmente, o Eixo Atlántico está traballando na creación dun repositorio que permita reunir e pór a disposición, de forma máis práctica e accesible, toda a información xerada durante estes tres anos de traballo, así como os contidos elaborados en etapas anteriores.
Tomé Roca sinalou que se trata “un dos retos máis urxentes e transcendentais do noso tempo: a loita contra o cambio climático e a transición cara un modelo de desenvolvemento máis sostible, máis xusto e máis eficiente. O plan de descarbonización dos municipios do Eixo Atlántico que se presenta hoxe aquí é un exemplo claro de cooperación, de planificación conxunta e de compromiso coa sustentabilidade desde o ámbito local”.
Nese sentido, Cárdenas puxo como exemplo unha das medidas que levou a cabo a Deputación de Lugo, coa incorporación de 5 vehículos eléctricos á flota da institución. Explicou que supón vendo o aforro nas emisións e no custo económico, que acada os 22.000€ ao ano.
Xoán Vázquez Mao, secretario Xeral do Eixo Atlántico asegurou que “con este Plan de Descarbonización, o Eixo Atlántico aposta por un modelo de industrialización sostible”.