Por segundo ano consecutivo, o Xeoparque Montañas do Courel vén de acoller un campionato de voos de parapente a longa distancia, organizado dende o Club Parapente Quiroga. Pero neste 2026 este evento mudaba o seu regulamento para dar máis opcións á participación, ademais de primarse os despegues desde o municipio de Quiroga, tal e como se indica dende este Concello.
O período no que se desenvolveu este campionato aéreo foi desde o 1 de xuño ata o 10 de setembro. Para participar os parapentistas tiñan que ter un seguro federativo ou seguro de accidentes e radiocontrol contratado con calquera compañía que cubra este tipo de actividades.
Ademais, os participantes no campionato debían xustificar os seus voos con tracks que permitiran calcular as horas dos despegues e aterraxes, así como as distancias e os tempos empregados nos percorridos aéreos.
Despois do fallo do xurado, o 12 de setembro na Casa de Cultura de Quiroga facíase entrega dos premios desta edición.
Os resultados do fallo eran os seguintes:
- Premio ao que cubriu a maior distancia partindo dende calquera dos despegues de Quiroga, Folgoso do Courel ou Ribas de Sil: Xaime Martínez Martínez, dotado con 1.500€.
- Premio para o maior número de horas de voo acumuladas e a maior altura alcanzada dentro do Xeoparque, dotado con 300€: Isidoro Táboas Moldes.
- Premio á mellor reportaxe fotográfica creativa: Imaxes aéreas e da comarca: Mara Filgueira Rama que se levou como premio 200€.O acto de entrega de premios contaba coa asistencia dos concelleiros quirogueses Antonio Marcos e Luis Manuel Arias, así como coa do presidente do Xeoparque, Roberto Castro, que quixeron amosar o seu apoio a este deporte e expresando o agradecemento ao Club de Parapente Quiroga por dar a coñecer o noso territorio desde as alturas.
Fotos: RTM Quiroga.