A nova sección Made in OU traerá ao “OUFF · Ourense Film Festival” ata nove traballos de creadores ourensáns ou feitos na provincia. Entre as obras seleccionadas hai documentais, curtametraxes de ficción e pezas de animación, varias delas con estrea no festival. Os traballos poderán verse en tres pases no Centro Cultural Marcos Valcárcel e nunha sesión especial no Cineclube Padre Feijoo.
Made in OU é unha das moitas novidades da 30ª edición do OUFF, e nace para que os creadores ourensáns teñan un escaparate dentro da programación do festival e poidan amosar públicamente o seu proxecto amateur ou profesional, que non acadara estar nas seccións oficiais ou sexa un formato non seleccionable. O Entroido da provincia será protagonista de varios dos traballos seleccionados, pero tamén falarán das raíces e da memoria colectiva, entre outros temas.
As obras seleccionadas para Made in OU son:
- El olvido, de Lucía Álvarez (ficción, 28 minutos).
- Nuno, de Antía Iglesias (animación, 3 minutos). Estrea no OUFF.
- O segredo do fulión, de Pepelu Viñas e Aimar Vega (documental, 14 minutos).
- A Penagache, de Marcos Seijo (documental, 15 minutos).
- O Entroido en Camba, de Laura Prieto Álvarez (documental, 4 minutos).
- Quen nos salva?, de Alberto Estévez Sánchez (documental, 28 minutos). Estrea no OUFF.
- Paula, con P de Reme, de Isabel Salgado (ficción, 23 minutos).
- Udra, de Charles Alexander (ficción, 20 minutos).
- A Luz das Ánimas, de Sergio Santos Otero (documental, 45 minutos).
O OUFF · Ourense Film Festival celebrarase do 26 de setembro ao 5 de outubro coorganizado pola Deputación de Ourense e a Asociación Luarada. Para esta edición especial, a dos 30 anos, haberá novas seccións como Made in OU, pero tamén Xeración OUFF, Agarimo ou Colleita.