Os 50 alumnos máis brillantes de España, seleccionados entre 4.378 colexios de todo o país para o programa Becas Europa, foron recibidos hoxe, 5 de xullo, polas Súas Maxestades os Reis de España no pazo da Zarzuela. Entre ese grupo de excelentes alumnos estivo o alumno ourensán merecedor desta distinción: Ricardo González, do IES As Lagoas.
Os alumnos con bolsa teñen unha media, en 1º Bacharelato, de 9,7 e proceden de distintas comunidades autónomas: Andalucía, Aragón, Asturias, Canarias, Castela-A Mancha, Castela e León, Cataluña, Comunidade Valenciana, Estremadura, Galicia, Madrid, Murcia e Navarra.
Estas bolsas son un proxecto da Universidade Francisco de Vitoria (UFV) e o Banco Santander para potenciar o talento universitario. Os seus principais obxectivos son facilitar a participación dos futuros universitarios no debate acerca da misión da universidade en Europa, promover o compromiso dos mozos universitarios coa súa propia formación e co desenvolvemento das que serán as súas universidades, e fomentar a creación de redes de estudantes en Europa.
O programa comezou este domingo, 2 de xullo, e rematará o venres 21 de xullo. Durante o seu percorrido, os participantes visitarán distintas cidades universitarias: Alcalá de Henares, Bolonia, Oxford, Londres, París, Heidenberg, Frankfurt, Santiago de Compostela e Madrid.
Durante estas tres semanas nas que se desenvolverán estas Becas Europa, os estudantes participan en diversas actividades para coñecer a realidade e a orixe da universidade en Europa, o que favorecerá ao máxico o aproveitamento da súa futura etapa universitaria.
No seu calendario de viaxe, asistirán a relatorios e grupos de traballo; encontros e coloquios e actividades culturais e de ocio visitando os principais monumentos, concertos e representacións teatrais; así como visitas a museos emblemáticos coma o Louvre, Pompidou, Musée D’Orsay…
