O Concello de Ourense e a Federación Galega de Hóckey informan da celebración de varios encontros da Selección Española de Hóckey Sala no Anexo do Pavillón dos Remedios. A cidade foi escollida como sede para estas xornadas de traballo do combinado nacional, que preparará o europeo de Heidelberg (do 8 ao 11 de xaneiro) no Torneo IV Nacións de Ourense.
A colaboración entre o Concello e a Federación permite que a Selección se desprace a Ourense para disputar unha serie de partidos. Ademais, o domingo 28, os máis pequenos poderán desfrutar dun clinic gratuíto cos xogadores da selección tras o seu primeiro encontro, unha actividade para iniciarse no hóckey sala e compartir a experiencia cos deportistas.
HORARIOS DOS PARTIDOS EN OURENSE:
- Domingo, 28 de decembro
11 horas: ESPAÑA vs ITALIA
12 horas: Clinic gratuíto coa Selección Española para nenos e nenas
14 horas: PORTUGAL vs SUÍZA - Luns, 29 de decembro
11 horas: ESPAÑA vs SUÍZA
12:30 horas: ITALIA vs PORTUGAL
17:30 horas: SUÍZA vs ITALIA
19 horas: PORTUGAL vs ESPAÑA - Martes, 30 de decembro
9 horas: Partido polo 3º e 4º posto
11 horas: Final do torneo
12:10 horas: Entrega de premios
Dende a Concellería de Deportes sinálase que a cesión das instalacións dos Remedios responde ao obxectivo de apoiar o traballo das federacións e ofrecerlle á veciñanza a posibilidade de ver hóckey de nivel nacional sen saír da cidade. Pola súa banda, a Federación Galega destaca a boa disposición do Concello para coordinar os aspectos loxísticos necesarios para que o equipo estatal poida desenvolver a súa actividade en Ourense.