Un total de 38 membros do Club Peña Trevinca Barco realizaban o 23 de marzo unha nova etapa do “Camiño do Monxe”, unha senda de longo percorrido pola Ribeira Sacra. Neste caso era xa a cuarta etapa, entre o Mosteiro de Santo Estevo de Ribas de Sil e Esgos, cun total de 23 km. “Tivemos un día estupendo e o percorrido, aínda que era de subida, fíxose bastante levadeiro. Ademais neste tramo acadamos o punto máis alto do total dos 140 km da ruta”, explica o presidente do Club Peña Trevinca Barco, Miguel de la Cal.
O grupo facía unha parada na metade da etapa para xantar e logo continuaba ata o Mosteiro de San Pedro de Rocas, “considerado un dos máis antigos de Europa” e unha xoia que conserva elementos de interese como numerosas tumbas antropomorfas. Esgos era ademais o final desta etapa. A seguinte, que teñen previsto realizar o 20 de abril, sería xa entre Esgos e Maceda.
Fotos: Club Peña Trevinca Barco.
