Na tarde do xoves 28 de maio, o Casino do Barco de Valdeorras acollía o acto de nomeamento por parte do Instituto de Estudos Valdeorreses do pintor barquense Jesús Díaz Ferrer como “Valdeorrés Ilustre”, ao que, ademais de membros do IEV tamén acudían ao acto a directora territorial da Consellería de Presidencia na provincia de Ourense Beatriz Fernández ; o subdelegado do Goberno, Eladio Santos; o alcalde do Barco, Aurentino Alonso, o presidente do Casino, Pablo Dobao e representantes dos institutos Lauro Olmo e Martaguisela, así como doutras entidades e veciños do Barco, entre eles o tamén artista Xelo de Tremiñá.
Tras a lectura da acta oficial de nomeamento, era o profesor de Historia do IES Lauro Olmo, José Izquierdo quen falaba da vida, destacada obra traxectoria de Jesús Díaz Ferrer, falando tamén da relevancia da súa figura a través dun proxecto educativo desenvolto no centro.
O acto remataba coa intervención de Eugenio Martínez Alejandre, que posúe boa parte da obra do artista, quen agradeceu o nomeamento convidando a visitar a exposición aberta dende onte no Casino. Antes, o sobriño do novo Valdeorrés Ilustre, Jesús Gómez Díaz, recollía o título de mans do presidente do IEV, Aurelio Blanco Trincado.
Todos compartían uns petiscos e un viño de Valdeorras.
Fotos e vídeo: Carlos G. Hervella.