O Cabido Xeral da Real Confraría do Santísimo Cristo da Unción e Nosa Señora da Serenidade de Santiago de Compostela vén de outorgar a súa máxima distinción a Manoel Carrete, natural da aldea da Seara (Quiroga), ao nomealo Confrade de Honra da institución.
A distinción, aprobada por unanimidade a proposta da Xunta de Goberno, pon en valor a traxectoria de Carrete e o seu “labor fundamental” na organización dos actos do centenario da Inmaculada. Así mesmo, a irmandade quixo agradecer o seu apoio loxístico e persoal durante a pasada saída extraordinaria.
Unha ponte entre tradicións
Manoel Carrete consolidouse como un colaborador estreito da confraría desde o irmandamento coa Semana Santa de Castro Caldelas. O seu labor de xestión cultural e relixiosa traspasará fronteiras este ano, xa que facilitará o encontro con representantes da Semana Santa de Popayán (Colombia), unha celebración declarada Patrimonio Inmaterial da Humanidade pola UNESCO.
Cerimonia en Santiago
O acto oficial de nomeamento tivo lugar este martes nas instalacións do Colexio da Inmaculada da capital galega. A cerimonia contou cunha presenza de excepción: o arcebispo emérito de Santiago, D. Julián Barrio, quen foi o encargado de facer entrega do diploma acreditativo e impoñer a medalla da Real Confraría ao homenaxeado quirogués.
Con este recoñecemento, a Confraría da Unción reforza os seus vínculos co interior de Galicia, personificados na figura dun Carrete que mantén sempre presente a súa orixe lucense na súa actividade na capital galega.