Madridjoya vén de anunciar aos galardoados da primeira edición dos seus premios. Con eles esta feira recoñece a profesionais e empresas pola súa contribución ao desenvolvemento da xoiería e a reloxería en España. Os distinguidos nas catro categorías da convocatoria son Isidoro Hernández, a firma coruñesa José Luis Joyerías, Gold & Roses e a familia Aguilar de Dios, mentres que o profesional trivés Pedro José Pérez Fernández recibirá o Premio de Honra Madridjoya.
Os premiados recibirán os seus recoñecementos durante a 75ª edición de Madridjoya, que se celebrará do 24 ao 27 de setembro no recinto feiral de Ifema en Madrid. A cerimonia terá lugar no marco desta convocatoria que reunirá a oferta de máis de 300 marcas e empresas procedentes de máis de 20 países e a miles de profesionais do sector. Os galardóns distinguirán así a traxectoria profesional, a excelencia comercial, a tradición do oficio e a innovación en produto, procesos, deseño e comercialización.
Pedro José Pérez Fernández, Premio de Honra Madridjoya
Pedro Pérez Fernández, empresario, editor e unha das figuras máis influentes na comunicación e promoción da xoiería e a reloxería en España. Nado en Trives (Ourense), desenvolveu unha traxectoria profesional estreitamente ligada ao sector, impulsando proxectos editoriais, comerciais e empresariais que contribuíron a conectar a fabricantes, distribuidores, marcas e profesionais durante máis de catro décadas. Durante máis de 50 anos ten sido líder de comunicación do sector en todo o mundo.
Fundador de Grupo Duplex, Pedro Pérez promoveu publicacións de referencia para a industria como Jewelry Duplex, Arte e Xoia, Duplex Press ou Contraste. A súa actividade levoulle a percorrer os principais mercados e feiras internacionais do sector, participando ademais no impulso e desenvolvemento de numerosas citas profesionais en España, entre elas, Madridjoya.
Madridjoya
A entrega dos I Premios Madridjoya incorporará un novo momento de recoñecemento dentro da programación da feira. Na súa 75ª edición, Madridjoya, en coincidencia con Bisutex, será un punto de encontro para o intercambio de coñecemento, a xeración de novas oportunidades de negocio e a posta en valor do talento que impulsa a evolución da xoiería e a reloxería. Os profesionais interesados en acudir a esta cita poden adquirir o seu pase na web de Madridjoya.