Numerosas persoas desprazábanse neste 14 de febreiro ata Vilariño de Conso para desfrutar do seu Entroido tradicional que neste 2026 se estrea como Festa de Interese Turístico Nacional. A partir das 11:30h. cobraba vida dende o Toural un intenso desfile, que remataba nas proximidades do Cenza, marcado polos toques de bombos, aixadas e gadañas e polos Boteiros (coas súas singulares danzas e saltos) dos diferentes fulións, chegados dende diferentes puntos do municipio e tamén de concellos limítrofes.
Abría a comitiva o Fulión de Vilariño de Conso, seguido dos de Pradoalbar, O Val, Conso, Veiguiña e San Cristovo, así como polos de Mormentelos, Carracedo da Serra (A Gudiña), Buxán (O Bolo), Bembibre e As Carrelas (Viana do Bolo), o da Mourela p’acá (Manzaneda), A Lardeira (Trives). Pechaba o desfile o fulión de Chaguazoso (Vilariño de Conso).
Fotos: A.R.
