Por todo o alto. Cun tempo que respectou, numeroso público e 23 folións e comparsas, o Entroido de Viana do Bolo estreábase neste Domingo Gordo como Festa de Interese Turístico Nacional.
Dende a zona alta da vila ata a praza Maior ante de coller rumbo ao Toural onde xantarían, ás 11:30 horas deste 15 de febreiro comezaba o espectacuñar desfile que un ano máis abría o Folión do Tameirón e remataba Vilarmeao pasadas as tres da tarde. E entre medias percorrían as rúas e praza de Viana os folións máis destacados e numerosos da contorna, moitos do concello de Viana pero tamén de Vilariño de Conso, Buxán, A Veiga, Petín ou Trives.
Ademais do toque de cada fulión, durante o percorrido e de forma moi especial na praza Maior onde agardaba un maior número de público, os boteiros e mázcaras abrían paso dando cor e intensidade á festa. Estaban Grixoa, Quintela de Edroso, Fornelos de Cova, Cabo da Vila, Penouta, Quintela do Pando, Santa Mariña, As Carrelas, Punxeiro, Fornelos de Filloás, Bembibre, Buxán, Alternativo, Mormentelos, A Veiga, Os Arrieiros, Os Labregos, Xuntos polo folión, Fradelo e Vilarmeao.
Fotos: Mónica G. Bellver.
Vídeos: Mónica G. Bellver e cedidos.