Con medallas, e ademais de ouro, arrancaba o XXVII Campionato Galego Sub16 que ao longo deste sábado se desenvolverá nas pistas de atletismo Luis Nogueira do Barco. Así a proba de 3 km marcha estaba protagonizada por dous valdeorreses.
Na competición masculina, o plusmarquista galego e campión de España dos 5K en ruta da pasada edición de Marín, Mateo Valcarce (Adas Cupa) facíase co título autonómico, ao vencer con rotundidade cun rexistro de 13:48.87. En segunda posición quedaba Antón Díaz (Club Atletismo Narón) e na terceira Pablo Pérez (Club Atletismo Sada).
Ouro tamén en categoría feminina, tamén nos 3 km marcha, para a barquense Paula Cela (Adas Cupa) que se proclamaba campioa galega, cun tempo de 16:27.33. A segunda posición correspondíalle a Daniela Rodríguez (At. Femenino Celta) e a terceira a Alba Vázquez (Atlética Lucense).
Por outra banda, o Adas colleitaba outra medalla nada máis iniciar o galego na proba de altura, cun segundo posto de Andrés Álvarez, cunha marca de 1,68.
En breve ampliarase información do campionato.