Santiago de Compostela será o escenario da inauguración dos XVI Xogos do Eixo Atlántico, que darán comezo o vindeiro 5 de xullo e converterán a cidade no epicentro do deporte xuvenil da Eurorrexión durante varios días. Esta nova edición reunirá 2.000 mozos e mozas procedentes de 28 municipios de Galicia e do Norte de Portugal, nun encontro que combina competición, convivencia e intercambio cultural.
Entre as principais novidades desta edición destaca a incorporación do voleibol masculino, un avance que permitirá acadar a plena paridade de xénero en todas as modalidades deportivas presentes nos Xogos. Deste xeito, refórzase o compromiso do Eixo Atlántico coa igualdade de oportunidades e a participación equilibrada de rapaces e rapazas no ámbito deportivo.
Outra das modificacións aprobadas é a eliminación da modalidade de fútbol 7 do programa oficial dos Xogos. Non obstante, está previsto elevar á Comisión Executiva unha proposta para a creación dun torneo específico desta disciplina, tanto en categoría masculina como feminina, que permita manter a súa práctica dentro do calendario deportivo do Eixo Atlántico.
Ademais, a organización acordou reducir a idade máxima de participación aos 14 anos en todas as modalidades, coa excepción das competicións de deporte adaptado. Esta medida busca potenciar a detección temperá de talento e favorecer o desenvolvemento deportivo das xeracións máis novas, fortalecendo o carácter formativo dos Xogos.
Precisamente no ámbito do deporte adaptado, esta edición contará con 125 participantes que competirán nas modalidades de atletismo e natación, reforzando así a aposta pola inclusión e a integración dentro do programa deportivo.
A edición de 2026 contará con cinco modalidades deportivas principais:
• Baloncesto (masculino e feminino)
• Balonmán (masculino e feminino)
• Voleibol (masculino e feminino)
• Atletismo e atletismo adaptado (masculino e feminino) • Natación e natación adaptada (masculino e feminino).
Os municipios galegos que participan son os seguintes:
- Carballo
- Lugo
- Monforte de Lemos
- O Barco de Valdeorras
- Ourense
- Ribeira
- Santiago de Compostela
- Sarria
- Vigo
- Vilagarcía de Arousa
A cerimonia de inauguración celebrarase o día 5 na Praza do Obradoiro ás 18.30 horas, mentres que as competicións deportivas desenvolveranse entre os días 6 e 10, convertendo Santiago de Compostela nun gran escenario de convivencia e intercambio para a mocidade de Galicia e do Norte de Portugal.
Nesta edición tamén se renderá homenaxe a José Guilherme Aguiar, en recoñecemento pola súa contribución e impulso aos Xogos do Eixo Atlántico a través da súa participación activa como presidente do Grupo Temático de Deporte, responsabilidade que desempeñou durante 13 anos e que resultou clave na consolidación e crecemento desta cita deportiva.
Os Xogos do Eixo Atlántico constitúen unha das iniciativas máis emblemáticas da cooperación entre Galicia e o Norte de Portugal, promovendo valores como a convivencia, a integración, a igualdade e o intercambio cultural a través do deporte.
Esta actividade enmárcase no proxecto Fénix, cofinanciado polo Programa Interreg España-Portugal (POCTEP) 2021-2027.