O Centro Cultural Marcos Valcárcel acolle desde o 16 de abril ata o 18 de maio a II Exposición Internacional de Art Brut “Ao Cubo”, unha iniciativa impulsada polo servizo de Saúde Mental da Área Sanitaria de Ourense que sitúa á cidade no mapa internacional desta corrente artística singular e profundamente humana.
Tras unha primeira edición celebrada en Zaragoza, esta segunda mostra chega a Ourense coa vocación de consolidar unha rede de colaboración entre tres entidades: Andar de Nones (TEAdir-Aragón), Alpha Cultures (Hospital de Cadillac, Francia) e ArtEspida, proxecto desenvolvido no Hospital de Piñor, pertencente á Unidade de Saúde Mental da Área Sanitaria de Ourense. Nesta ocasión, Ourense actúa como sede anfitrioa, reforzando o seu papel como espazo de encontro e referencia no ámbito do Art Brut.
O Art Brut: unha arte fóra dos circuítos convencionais
O Art Brut define unha forma de creación artística allea ás normas académicas e aos circuítos tradicionais da arte. Trátase dunha expresión libre, directa e espontánea, onde o importante non é o recoñecemento externo senón a necesidade de crear e de comunicarse co mundo.
A exposición ofrece ao público unha oportunidade única para achegarse a obras que nacen desde a autenticidade, afastadas de etiquetas diagnósticas ou estigmas sociais, e que reflicten a relación íntima de cada artista coa súa propia experiencia.
ArtEspida e o Hospital de Piñor: un referente estatal
Un dos piares fundamentais desta exposición é o proxecto ArtEspida, desenvolvido no Hospital de Piñor, un centro que se ten consolidado como referente a nivel nacional no ámbito do Art Brut.
ArtEspida é un espazo de libre creación que utiliza a arte como ferramenta de expresión e acompañamento de persoas con sufrimento psíquico. Cun enfoque orientado pola psicanálise, promove a creación sen xuízos nin obxectivos predeterminados, favorecendo a aparición da subxectividade e a valorización persoal.
Tal e como sinala Andrés Díaz Rodríguez, codirector de ArtEspida no Hospital de Piñor, “o importante non é o resultado final da obra, senón o proceso creativo e o lugar que este abre para que cada persoa poida expresarse desde a súa singularidade, fóra de etiquetas e estigmas”.
Nesta liña, o Hospital de Piñor configúrase como un espazo onde a arte permite acompañar ás persoas no seu percorrido vital, sen a pretensión de “curar”, senón de ofrecer ferramentas para habitar o mundo dunha maneira máis propia e menos condicionada.
Un proxecto internacional baseado na colaboración e a inclusión
A exposición reúne obras procedentes de tres iniciativas que comparten unha mesma filosofía: crear espazos onde as persoas poidan desenvolver procesos creativos en liberdade.
• Andar de Nones facilita talleres artísticos para persoas con diversidade psíquica, promovendo o benestar e o lazo social.
• Alpha Cultures sitúa a creación artística no centro do acompañamento de nenos e adolescentes en contextos sanitarios.
• ArtEspida, desde Ourense, achega unha visión centrada na liberdade creativa e na subxectividade.
As obras expostas son o resultado de procesos creativos compartidos, onde o esencial é o acto de crear e a relación que cada artista establece co mundo.
Un espazo para o encontro e o recoñecemento
“AO Cubo: AL” propón unha experiencia que vai máis alá da contemplación artística. Cada obra ofrece ao visitante a oportunidade de recoñecer o valor do creador e de participar nun espazo de encontro onde se fortalecen os vínculos sociais.
A mostra reivindica lugares onde as persoas poidan “estar ben” e “estar como son”, favorecendo a creatividade sen imposicións e promovendo unha mirada máis aberta e inclusiva cara á saúde mental.
Unha cita coa arte máis auténtica
A II Exposición Internacional de Art Brut en Ourense constitúe unha oportunidade única para descubrir unha arte sincera, directa e profundamente humana, ao tempo que visibiliza o traballo desenvolvido desde o ámbito da saúde mental.
A cidadanía está convidada a achegarse ao Centro Cultural Marcos Valcárcel entre o 16 de abril e o 18 de maio para coñecer de preto estas creacións e deixarse interpelar por unha proposta artística que reivindica a liberdade, a diversidade e o valor da expresión individual.