Un pouco máis tarde que outros anos, o sábado 7 de febreiro, celebrarase nesta ocasión a Romaría de San Francisco Blanco, na capela de Outarelo (O Barco).
O Tríduo celebrábase do 4 ao 6 ás 17:30 horas; e xa o día propio haberá tres misas, ás 10:30, ás 11:30 e a principal ás 12:30 horas, presidida polo párroco Jesús Álvarez. A esa hora acudirán representantes da parroquia do Tameirón (A Gudiña), lugar de nacemento do santo, co que a parroquia barquense se irmandaba en agosto do ano pasado. Traerán a súa reliquia e xuntos, sempre que o tempo o permita, percorrerán as rúas de Outarelo en procesión, antes de celebrar a eucaristía no interior da capela.
Como en toda romaría que se precie, non faltará o polbo á feira e o churrasco e como todos os anos, espéranse as roscas nos postos diante da capela para que non se perda a tradición. A música correrá un ano máis a cargo dos gaiteiros Celtas Largos.
Ao día seguinte, domingo día 8 celebrarase a misa de San Antón ás 13:15 horas.