As rúas do Concello de Quiroga enchéronse esta pasada fin de semana de centos de curiosos que, ataviados con vestimentas de época, saudaban o paso das lexións romanas e dos castrexos. A IV edición da Festa Castrexo-Romana Qui-Roma celebrouse cun éxito rotundo de público. Tras o desfile polas rúas máis céntricas da vila, o espectáculo trasladouse posteriormente á Praza Maior, onde se levaron a cabo as tradicionais loitas entre romanos e castrexos. Estes últimos, presos polos romanos, loitaron con dignidade por acadar a súa libertade.
Unha vez rematado o circo, a multitude congregada na praza deu paso ao grupo de animación Troula que, con zancudos incluídos, fixo vibrar a festa con música de tambores e espectáculo con malabares e lume. De igual xeito polas rúas da vila, a xente bailaba ao son da música de diferentes grupos de gaiteiros, que tamén vestidos de romanos, amenizaban o ambiente nas terrazas dos bares. No entorno da Praza Maior tamén se estableceron postos de artesanía e de venda de productos gastronómicos, entre outras actividades.
Texto e fotos: Sara Fontenla/ Ángeles Rodríguez.
