Na tarde deste luns 25 de agosto unha menor era reanimada tras ser rescatada inconsciente da auga na piscina municipal de Vilar de Barrio, tal como explican dende o 112 Galicia que era alertado por un particular dez minutos despois das 17:30 horas indicando que “unha menor estaba sendo atendida polo socorrista das piscinas municipais tras ser rescatada inconsciente da auga”. Naquel momento, outros alertadores explicaron que “estaban tratando de reanimala”.
Desde o Centro Integrado de Atención ás Emerxencias solicitaban de inmediato a acción de Urxencias Sanitarias de Galicia-061, da Garda Civil, do GES de Maceda e dos voluntarios de Protección Civil de Vilar de Barrio.
“Por fortuna, finalmente as manobras de reanimación finalizaron con éxito e a menor foi evacuada consciente en ambulancia ao centro hospitalario de referencia”, indican dende o 112, engadindo que ata o lugar tamén se mobilizou o helicóptero medicalizado con base en Ourense de Urxencias Sanitarias de Galicia-061.