Enma Pedreira, Lucía Aldao, Inma Núñez, Luciano Rodríguez e Aleixandre Lago (poetas, músicas, filólogas e investigadoras) integran o xurado do 6º Premio de Poesía Florencio Delgado Gurriarán que bateu o seu propio récord de obras presentadas a concurso. “Habitualmente os poemas presentados estaban en torno aos 150, pero nesta sexta edición do certame hai 226 textos admitidos a concurso de 138 autores e autoras diferentes”, indican dende a Fundación.
Este premio, que naceu no 2018 para “impulsar a creación poética en galego”, ten un premio único de 3.000 euros a un poema; e os requisitos das obras é que sexan inéditas, estean escritas en galego e non superen os cincuenta versos de lonxitude.
“O xurado, terá o seu veredicto listo a finais de agosto e o 10 de setembro farase público o nome dos tres poemas finalistas”, aseguran dende a Fundación, avanzando que o vencedor do premio coñecerase na gala que en cada edición pon o broche ao certame, reunindo palabra, música e territorio. O ano pasado celebrouse no Bolo e nesta ocasión será no Barco de Valdeorras, no Teatro Lauro Olmo, seguindo o criteiro da Fundación de facer as súas actividades itinerantes entre os diferentes concellos da comarca.
“Nesa gala volverá ter protagonismo a imaxe deseñada para o premio por parte da artista valdeorresa Patricia Fernández, lapintiparada”, din dende a Fundación, explicando que o cartel “xoga con dous retratos moi coñecidos de Florencio, evocando o paso do tempo e as súas transformacións”. Fernández súmase así ao equipo de artistas comarcais que teñen asinado colaboracións co Premio e máis a Fundación, entre os que tamén están Eva Piay, Carina Rodríguez ou Iván Prieto. “Neste 2025 tamén se estrea como colaboradora da Fundación a poeta rubianesa Inma Núñez, no seu caso como parte do xurado”.