O subdelegado do Goberno en Ourense, Eladio Santos, supervisaba esta mañá o avance das obras que executa o Ministerio para a Transición Ecolóxica e o Reto Demográfico cun investimento de 5,8 millóns de euros. Alí referíase á “aposta do Goberno pola seguridade dos montes ourensáns, cunha reforma da base da Brigada de Reforzo de Incendios Forestais (BRIF) que reforza a capacidade de resposta”.
Eladio Santos explicou que esta actuación busca “dotar o equipo da BRIF de Laza duns espazos máis funcionais, sostibles e seguros”. Estivo acompañado do xerente de Tragsa en Ourense, José Manuel García Troitiño, quen explicou que as principais actuacións son un novo edificio principal, con inmobles auxiliares, a modificación do trazado do camiño de acceso, un novo valado e a mellora do heliporto.
Por outra banda, o subdelegado analizou co coordinador da BRIF de Laza, Bruno Ondoño, as perspectivas para este verán. “O operativo está preparado para actuar cando sexa preciso coa máxima profesionalidade”, confirmou Santos.
Nesta liña, o subdelegado reafirmou que o Goberno de España pon a disposición da Xunta todos os medios de titularidade estatal necesarios para actuar na prevención e extinción de lumes, como son as BRIF, Garda Civil, Policía Nacional, Protección Civil, a Unidade Militar de Emerxencias (UME) o Exército de Terra, a AEMET e os medios aéreos do MITECO, con fin de completar os medios da Comunidade Autónoma que ten as competencias nesta materia.
Ademais, o subdelegado subliñou a sensibilidade do Goberno coa realidade galega tras a vaga de lumes, con máis de 29 millóns de euros mobilizados en axudas, reparación de danos e restauracións en Galicia.
Tamén abordou coa BRIF as melloras das condicións laborais aprobadas polo Goberno para os bombeiros forestais. “O coeficiente redutor da idade de xubilación salda unha débeda histórica e recoñece a dureza dun traballo esencial para protexer Galicia”, explicou.
Avance das obras
Os traballos xa executados na Modernización da base da BRIF de Laza son as actuacións previas e demolicións; movementos de terras, cimentacións e estruturas, cubertas, pechamentos e particións, alisamentos e impermeabilizacións. Nestes momentos as intervencións que se atopan en execución son as fachadas con acabados de SATE, os revestimentos interiores de paredes e falsos teitos; os aseos e cociñas, carpintería exterior de aluminio, instalacións de electricidade, fontanería e cimentación e a urbanización de aparcamento.
