Pasadas as doce do mediodía deste 18 de febreiro, a Policía Local do Barco recibía o aviso da propietaria dunha cadela indicando que o animal, nun descoido, sairá da súa vivenda e saltara ao tellado dun edificio próximo do centro da vila, onde quedaba atrapado.
Dábase entón aviso aos bombeiros do parque comarcal que trasladaban dous vehículos á zona, un deles con escaleira estensible co fin de poder chegar ata a cadela, de nome Babi e raza Border Collie de 3 anos de idade. A solución pola que se optaba era acceder dende o tellado dun inmoble da rúa da Estación, que décadas atrás era unha distoteca.
Así o facían dous bombeiros, que dende a cesta do camión ascendían polo tellado ata chegar ata a cadela, suxeitábana e iniciaban o percorrido de volta. Abaixo, visiblemente nerviosa, a súa dona seguía paso a paso o rescate, que remataba felizmente arredor das 13:15h, cando a propietaria abrazaba emocionada a Babi, xunto aos bombeiros e os policías locais que participaban no operativo de rescate.
Ademais facíano entre os aplausos das numerosas persoas que se congregaban na rúa da Estación do Barco, á altura do número 13, seguindo o rescate.
O operativo, que durou aproximadamente unha hora, obrigaba a cortar durante este tempo a rúa da Estación, na parte que dá acceso ao paseo do Malecón.
Fotos: Periódico O SIL.
