Neste 20 de setembro o servizo de Neuroloxía do CHUO vén de organizar, en colaboración coa Asociación de Familiares de Enfermos de Alzheimer de Ourense (AFAOR) e o Club de Xadrez Liceo de Ourense, un torneo solidario de xadrez para conmemorar o Día Mundial do Alzheimer.
Este torneo, que tiña lugar no espazo Ágora do CHUO, situado na azotea do edificio de hospitalización, e estaba dirixido aos pacientes de Alzheimer, aos seus familiares, afeccionados ao xadrez e aos traballadores da Área Sanitaria de Ourense que desexasen sumarse a esta iniciativa solidaria.
Con esta actividade, coordinada polo Xefe de Servizo de Neuroloxía do Hospital Universitario de Ourense, Daniel Apolinar García Estévez, e por Joaquín Bello, mestre de xadrez, búscase visibilizar os beneficios da utilización de ferramentas e xogos, como pode ser o xadrez, no adestramento cognitivo. Este tipo de exercicios permiten atrasar o envellecemento cerebral e diminuír así o risco de desenvolver alzhéimer, así como outras demencias senís.
Fotos cedidas.
