O vindeiro venres 7 de agosto comezarán as tres xornadas de celebración da XIX Feira do Viño de Monterrei, en Verín, nas que están previstas a realización de actividades culturais, enogastronómicas e musicais. A principal será a feira que terá lugar na praza da Alameda, e na que esta edición estarán presentes as seguintes adegas: Vía Arxéntea, Crego e Monaguillo, Gargalo, Terras do Cigarrón, Manuel Vázquez – Viticultor, Father 1943, Ramón Bigotes, 3 Mentiras, Ronsel do Val, Ladairo, Adegas Tapias Mariñán, Adega Pazo das Tapias, Adegas Daniel Fernández, Serra de Alén, Triay, Abeledos, Setembro, Quinta do Buble e Valderello.
O horario de apertura das casetas será o seguinte: venres de 20.00 a 24.00 h. (venda anticipada a partir de as 19.00 horas), sábado 09 de 12.30 a 14.30 h. e de 19.30 a 01.00 h., e domingo 10 de 12.30 a 14.30 h e de 19.30 a 24.00 h.
Alén das casetas das adegas, estarán presentes postos gastronómicos aptos para todos os padais (Cárnicas de Feces, Juan Álvarez Cortador de Xamón, Panadería Germán, Xamóns Don Francisco, Varzea Açai, Luan’s, Panadería Roscas e Lolo, Taiyo Sushi, Punto Criollo, Food Truck A Leñeira e Casa do Pulpo).
A inauguración da XIX Feira Viño de Monterrei será este venres, a partir das 20 horas, na praza García Barbón, e o pregón correrá a cargo da futbolista Antía Pérez, autóctona de Laza.
Anteriormente, ás 18.30 horas, celebrarase na Igrexa Parroquial de Verín, o acto de imposición de medallas da Confraría dos Viños de Monterrei. Nesta ocasión recaerán en Vicente Rodríguez Jiménez, Enrique Fernández Pérez e José Luis Mateo García. A entrada será libre ata completar aforo.
Xa nas xornadas do 9 e 10 de agosto, levaranse a cabo catas comentadas e showcookings, para o público adulto. Están previstas as seguintes actividades: o showcooking “Alquimia Atlántica na cociña de Monterrei 2026”, dirixido por Begoña Vázquez e Miguel López; a cata comentada “Todos os camiños levan a Monterrei. Pasado – Presente – Futuro”, conducida pola catadora Mariña Fernández Toro; e o showcooking “Sabores auténticos: Fusión de conservas ecolóxicas con viños da D.O. Monterrei”, a cargo de José Luis Prieto e Miguel López.
Doutra banda, e xa para o público infantil, durante a fin de semana, de 20 a 22 horas, levaranse a cabo xogos populares no interior da Alameda.
A programación completa da Feira do Viño de Monterrei pode consultarse aquí 2026 diptico feira do viño