Na mañá deste xoves 24 de xullo tres persoas resultaban feridas, tras saírse da vía en Maceda, segundo indican dende o 112 Galicia, explicando que os equipos de emerxencia “tiveron que intervir para liberar ao condutor e ao acompañante do turismo”.
O 112 Galicia recibiu o aviso ás 10:55 horas, cando un particular alertaba dunha saída de vía na OU-104, no quilómetro 5, ao seu paso polo concello ourensán de Maceda. Segundo indicaba o alertante, “no interior do vehículo había varias persoas feridas”.
Desde o 112 Galicia mobilizábase ao Servizo de Urxencias Sanitarias de Galicia-061, ao GES de Maceda, aos Bombeiros de San Cibrao, á Garda Civil de Tráfico, á Policía Local e a Protección Civil. “Unha vez no punto, os equipos de intervención confirmaron a necesidade de empregar o material de excarceración para liberar ao condutor e ao acompañante do turismo”, din dende o 112, indicando que estas dúas persoas, xunto con outra que tamén precisou asistencia, “foron trasladadas ao centro hospitalario de referencia”.