Na mañá deste sábado 18 de outubro tres persoas resultaban feridas nunha colisión entre dous coches en Cualedro, tal como indican dende o 112 Galicia, puntualizando que “unha delas tivo que ser excarcerada polos Bombeiros de Verín”.
Dez minutos antes das 11 horas, o 112 Galicia tivo constancia dun accidente no quilómetro 5 da OU-1018 (parroquia de Rebordondo) a través da chamada dun particular. “Desde o primeiro momento, o alertador sinalou que tres persoas precisaban asistencia sanitaria e unha delas permanecía atrapada nun dos coches”, explican dende o 112.
No operativo participaron Urxencias Sanitarias de Galicia-061, que mobilizou o helicóptero medicalizado con base en Ourense, os Bombeiros de Verín e a Garda Civil de Tráfico, así como os servizos de mantemento da estrada. “Os bombeiros encargáronse de liberar á persoa atrapada, que era incapaz de abrir a porta do vehículo e os tres feridos foron evacuados ao hospital de referencia”, din dende o Axega.