Na mañá deste martes producíase un accidente nunha plataforma elevadora nas obras das vías de ferrocarril que se levan a cabo en San Cibrao das Viñas, no que falecía un traballador e outro resultaba ferido.
Tal como indican dende o 112 Galicia, recibían o aviso contra as 10 horas, cando “un particular informou de que un operario quedara atrapado por unha peza da maquinaria cando se atopaba nun elevador, e apuntou xa durante a chamada a posibilidade de que estivese falecido”.
Acto seguido, o Centro Integrado de Atención ás Emerxencias mobilizaba a Urxencias Sanitarias de Galicia-061, á Garda Civil, aos Bombeiros do Polígono de San Cibrao das Viñas e ao GES do Pereiro de Aguiar.
Unha vez no lugar, “os servizos sanitarios confirmaron o falecemento do traballador atrapado”, din dende o 112, engadindo que os bombeiros tiveron que intervir para liberar o corpo do falecido, que quedara atrapado e ademais, “outro operario sufriu unha lesión nunha perna”.