A Asociación GDR Valdeorras pon en marcha un completo programa de formación gratuíta dirixido a profesionais dos sectores turístico, vitivinícola e hostaleiro da comarca, así como a calquera persoa interesada en mellorar os seus coñecementos no ámbito do enoturismo. A participación está aberta tanto a integrantes da Ruta do Viño como a persoas ou empresas que non formen parte da asociación, co obxectivo de ampliar o impacto desta iniciativa en todo o territorio.
Esta acción desenvólvese no marco do Plan de Sustentabilidade Turística en Destino (PSTD) “Valdeorras, Ruta do Viño Milenaria”, e busca impulsar a calidade, a innovación e a diferenciación da oferta turística do territorio.
O programa formativo pretende reforzar a profesionalización do sector e fomentar a creación de experiencias turísticas auténticas vinculadas ao viño, a gastronomía e a contorna natural de Valdeorras, contribuíndo así a consolidar o Ruta do Viño como un destino sostible, competitivo e con identidade propia.
A formación está deseñada para ofrecer ferramentas prácticas a empresas e profesionais interesados en mellorar os seus servizos, desenvolver novos produtos turísticos e adaptarse ás tendencias actuais do mercado.
Programa de formación
O calendario inclúe catro accións formativas que combinan modalidade presencial e en liña:
• Especialistas en viño (presencial) 12 e 13 de marzo
• Creación de produtos e experiencias turísticas (en liña) 17, 18, 23 e 24 de marzo
• Atracción do turista deportivo á oferta do territorio (en liña) 7 e 8 de abril
• Introdución á enogastronomía: a cultura do Km 0 (presencial) 13 e 14 de abril
Estas sesións abordarán aspectos coma o coñecemento do viño, o deseño de experiencias turísticas, a captación de novos perfís de visitantes ou a valorización da gastronomía local e os produtos de proximidade.
Más información: https://drive.google.com/file/d/1Pjbu3ozJv1E0KK7uIidA5tAf-yx97Bnb/view
Inscricións: https://cvpvr9l44d4.typeform.com/to/cv5JjwuN?typeform-source=www.google.com