Coa música da Banda de gaitas Aturuxo do Cenza e cunha parella de Boteiros no escenario, arrincaba a fuliada deste Domingo de Pascua en Vilariño de Conso. Multitude de persoas, tanto deste municipio como doutros limítrofes como Manzaneda e Viana do Bolo, congregábanse no pavillón polideportivo da vila para asistir a esta representación satírica en verso propia do Entroido vilariñés, recuperada tras unha paréntese de dez anos. Así o explicaba Lorena, que introducía esta fuliada para “resumir e aclarar a idea do significado da función de hoxe. A continuación recordaremos unha fuliada presentada neste mesmo lugar hai 30 anos, o autor foi o señor Vicente. As inquietudes e as preocupacións de entón, non eras as mesmas de agora”. E incidía en que a idea desta función é lembrar e render unha homenaxe “a toda a xente que nos marcou o camiño que as fuliadas representan con cariño, falamos de pasado con emoción. Gracias a todos de corazón”.
A partir de aí, a presentadora collía o relevo e comezaba a farsa. “Saúdo a toda esta xente,/ que dá moita alegría/ moitas gracias a todos/ por facernos compañía./ A máis sinceira benvida/ a todos os compañeiros/ e a acollida máis veraz/ a veciños e forasteiros“. E matizaba, “coas fuliadas de antaño/ non nos imos comparar/ falta xente/ falta tempo/ e ata enxeño nos ha de faltar./ Somos conscientes/ que todo puidera ser mellorado/ pero aínda así/ esperamos que sexa do voso agrado“. E por suposto, non faltaba a tradicional petición de perdón por adiantado, “por se as cousas non foron/ como tiñamos pensado“.
Intercaladas coa música da banda de gaitas, ía dándose paso ás pezas, entre elas disputas de namorados e outras nas que se repasaban en clave de sátira a situación dos gandeiros, as obras de construción da presa do Cenza, o oficio do afiador e mesmo unha campaña electoral das municipais a través dunha galería de personaxes, que incluían Boteiros e Señoritas e o Paiaso.
E entre disputa e disputa, a fuliada chegaba ao seu fin, tal e como anunciaba a presentadora contra as dúas da tarde. “Para o ano que vén xa veremos/ de dedicarnos con ansia/ para sacarlle máis sustancia,/ se é que antes non morremos./ Aos actuantes despido,/ que aplaudan con moito afán,/ e sen máis con este ademán/ xa a amigos me despido“.
Entre aplausos e sons de esquilas concluía a representación e dábase paso ao capítulo de agradecementos e ás homenaxes, por parte de Yoli, representante da Asociación Vive Vilariño. “E primeiro lugar, a toda a xente que formou parte desta fuliada, grazas por dicir si dende o primeiro momento e grazas por estar sempre dispostos a todo o que propoñemos que non é pouco”. Tamén se agradecía a colaboración da banda de gaitas, á Asociación Xuntos polo Fulión “e a toda a xente que nos acompañou hoxe na ronda do fulión. A colaboración entre asociacións é moi importante, oxalá sigamos colaborando xuntos e remando todos na mesma dirección”.
Así mesmo, dábanse as grazas “a todo o grupo de voluntariado xuvenil, por ser os encargados de recoller e recompilar fuliadas, versos, cantigas e sons de Entroido, e aos de Talento Interxeracional”; á Consellería de Cultura, Lingua e Xuventude, ao Concello de Vilariño de Conso “por apostar polas asociacións e darlle o valor e recoñecemento que se merecen e por cedernos sempre os espazos que necesitamos”, e a Pepe de Sabuguido. “Nós tiñamos ganas ilusión e compromiso, pero faltábanos o motor que nos guiase”, dicía en referencia a el, “grazas pola túa paciencia, sabedoría e inventiva, coa que nos acompañaches en cada ensaio, sen a túa axuda, nada sería igual”. Finalmente, e visiblemente emocionada, Yoli manifestaba o agradecemento da familia do señor Vicente por “esta pequena pero emotiva homenaxe”.
Ademais facíase entrega dun agasallo, unha placa por parte de Vive Vilariño como da Asociación Xuntos polo Fulión: a Pepe de Sabuguido e outro á familia do señor Vicente.
A celebración desta fuliada, cuxo programa se encetaba ás 11h. cunha ronda de fulión por Vilariño ata o pavillón, tamén incluía un xantar popular ás 14:30h. no pavillón. Pola tarde, había música da man da charanga El Brexit.
Fotos: A.R./ Carlos G. Hervella
Vídeos: O SIL.
