Valdeorras prepárase para acoller, do 15 ao 17 de maio, unha nova edición da Primavera de Portas Abertas, unha cita de referencia para os amantes do viño e o turismo experiencial que ofrecerá durante toda a fin de semana un amplo programa de actividades para todos os públicos. Esta iniciativa forma parte do programa Primavera de Portas Abertas das Rutas Viños de Galicia e está financiada pola Axencia de Turismo de Galicia, consolidándose como unha das propostas enoturísticas máis salientables do calendario galego.
O evento propón unha inmersión total na cultura vitivinícola da zona, coas adegas como eixo central da programación. Durante estas xornadas, permanecerán abertas ao público ofrecendo visitas guiadas en distintos horarios, onde os asistentes poderán coñecer de primeira man o proceso de elaboración do viño, percorrer viñedos e instalacións e desfrutar de degustacións. Ademais, moitas adegas complementarán a experiencia con actividades especiais como catas a cegas, visitas a covas tradicionais ou maridaxes con produtos locais.
A inauguración oficial terá lugar o venres 15 de maio coa celebración dun Túnel do Viño. Neste espazo, os visitantes poderán catar máis dunha vintena de referencias de distintas adegas nun ambiente dinámico amenizado con música en directo. Para facilitar a participación, poñeranse en marcha rutas organizadas en autobús que percorrerán diferentes puntos de interese da comarca. Estes itinerarios permitirán visitar varias adegas nunha mesma xornada, sempre acompañados por guías especializados, e incluirán tempo libre para desfrutar da gastronomía local.
A programación complétase cunha ampla oferta de actividades na natureza, como visitas ao Parque Natural Serra da Enciña da Lastra (Rubiá) ou rutas de sendeirismo guiadas en enclaves de gran valor paisaxístico como Pena Trevinca, o punto máis alto de Galicia.
Tamén se organizarán paseos interpretativos que combinan historia, patrimonio e paisaxe, como o percorrido polo Camiño de Inverno ao seu paso polo Barco. O patrimonio cultural da comarca terá así mesmo un papel salientable, con visitas guiadas a espazos emblemáticos como o Santuario das Ermidas (O Bolo), o Castelo do Bolo ou o Museo de Yosso, moitas delas con prazas limitadas e carácter gratuíto ou a prezos simbólicos.
Como novidade, o programa incorpora propostas experienciais que combinan benestar, natureza e viño, como sesións de meditación entre viñedos, actividades sensoriais con música en directo ou rutas interpretadas con degustación final.
A gastronomía será outro dos grandes atractivos destas xornadas, con menús especialmente deseñados para a ocasión polos restaurantes asociados, maridados con viños da denominación de orixe. Así mesmo, os visitantes poderán beneficiarse de ofertas especiais de aloxamento durante toda a fin de semana, facilitando así unha experiencia completa no destino.
Con esta completa programación, a Primavera de Portas Abertas en Valdeorras consolídase como unha oportunidade única para descubrir o territorio a través dos seus viños, a súa paisaxe e a súa rica tradición cultural e gastronómica. Para consultar o programa completo de actividades, horarios e detalles de participación, os interesados poden visitar a páxina web oficial do Ruta do Viño de Valdeorras (www.rutadelvinovaldeorras.com), así como o portal turístico de Galicia (www.turismo.gal), onde atoparán toda a información actualizada sobre esta nova edición da Primavera de Portas Abertas.