A directora xeral de Administración Local, Natalia Prieto, visitaba hoxe a Casa do Concello de Cortegada, onde se instalou un ascensor cunha achega da Xunta de 40.000 euros no marco da orde de infraestruturas de uso público. O obxectivo da medida é garantir a accesibilidade da cidadanía ás dependencias do primeiro andar do edificio consistorial.
Visitou tamén o pavillón municipal, no que se mellorou a eficiencia enerxética grazas á substitución da cuberta por outra con mellor illamento e das luminarias por outras de tecnoloxía led. O Goberno galego investiu preto de 108.000 euros nesta actuación a prol do confort e do aforro, a través do fondo adicional do Fondo de Cooperación Local.
Ao abeiro desta mesma liña de acción, Cortegada recibiu a maiores 29.000 euros para equipamentos destinados ao servizo de abastecemento de auga e outros 46.000 para a instalación de contadores para o depósito de Carballal e a mellora da rede de abastecemento na rúa Fermín Bouza Brey.
O investimento do Goberno galego nos últimos anos en Cortegada a través das liñas específicas de apoio ao eido local suman preto de 1,2 millóns de euros. A Xunta destinou en 2023 máis de 27,2 millóns de euros para a execución de máis de 600 proxectos municipais.
Nesta contía inclúense 3,5M€ da Orde de infraestruturas de uso público para apoiar máis dun cento de entidades locais de menos de 30.000 habitantes. Ourense foi a provincia cun maior número de concellos beneficiarios cun total de 31 que suman axudas por máis de 1 millón de euros
Por outra banda, destináronse máis de 8,2M€ ao Fondo de Compensación Ambiental para mellora da contorna natural de máis de 200 concellos (93 da liña competitiva á que concorren todos os concellos e 119 á non competitiva por contar con parques eólicos). A meirande dos 93 concellos beneficiados na liña competitiva son da provincia de Ourense, con 40 proxectos que suman un investimento de 1 millón de euros.
Os 15,6M€ restantes correspóndense co fondo adicional do Fondo de Cooperación Local para 257 proxectos de mellora de eficiencia enerxética en edificios públicos, compra de equipamento para servizos municipais e modernización das redes de abastecemento en concellos de menos de 15.000 habitantes. Dos 257 concellos beneficiarios das tres liñas de axudas en toda Galicia, 88 son da provincia de Ourense.
