A Consellería de Medio Rural destinará preto de 60.000 euros á adecuación e posta en valor do espazo forestal periurbano de Montealegre, en Ourense. Así o anunciou onte a titular deste departamento, Ángeles Vázquez, que estivo visitando a zona acompañada do alcalde da cidade, Jesús Vázquez, no marco da presesntación das obras.
A conselleira prevé que as actuacións comecen antes do verán para ampliar e acondicionar este parque. Dixo que o obxectivo é que a cidadanía poida gozar desta zona, con especial atención á practica de deportes e o lecer. Detallou asimesmo que se trata dun espazo de 146.340 metros cadrados que destaca pola súa “excepcional riqueza natural” e polas súas “peculiaridades antropolóxicas e biolóxicas, que se verán reforzadas pola plantación de especies singulares”.
Tal e como se concretou, as obras incluirán a creación de sendas peonís e a instalación de mobiliario. Tamén se aplicarán tratamentos para eliminar posibles especies invasoras da zona.
