O vindeiro 9 de marzo ás 18h. terá lugar no albergue de Vilariño de Conso a charla-coloquio “Necesidades vitais ineludibles”. “É importante saber que ademais das necesidades do nivel físico (respirar, beber, comer, durmir, etc.) temos necesidades ineludibles noutros niveis que, de non ser cubertas, xeran a perda das ganas de vivir”, explican dende a organización desta actividade, na que se abordará este tipo de cuestións.
Esta iniciativa forma parte do proxecto “Comprendendo a vida”, promovido polo Concello de Vilariño de Conso en cooperación co Centro de Escolas de Resolución de Conflitos.