Dende as 19h. desta tarde de 9 de novembro, un grupo de traballadores de Irosa-Samaca, xunto con representantes da CIG, volvía subir ata as instalacións desta empresa, situada no Trigal (Carballeda de Valdeorras), e mobilizábase para evitar que se saque lousa da súa praza.
Ao parecer, despois de que o persoal saíse de traballar esta tarde, chegou á zona un camión co fin de sacar lousa da praza de Samaca. Hai que lembrar que dende o 19 de setembro, cando representantes do Xulgado do Barco executaban a setenza de desafiuzamento (promovida pola Comunidade de Montes Portela e Trigal) dos terreos nos que está a empresa, procedíase ao peche das oficinas e do almacén, así como ao seu cambio de pechaduras. Polo tanto a zona da praza de Samaca está na parte xa desafiuzada, pero que, segundo a empresa, é propiedade dela por ser comprada, non da comunidade de montes.
“Os traballadores subiron para mobilizarse e evitar que saia o camión porque xa era o que faltaba, que aínda por riba lle quiten a lousa á empresa, porque esa lousa non é deles”, explica o secretario local da CIG en Valdeorras, Francisco Moral. “De momento estamos aquí un grupo de traballadores e de membros do comité de empresa da CIG a ver que sucede. Pero a nosa intención é quedar aquí porque van intentar sacala seguramente”.
Imaxe cedida.