A Xefatura Provincial de Tráfico de Ourense vén de infomar de que neste mércores 3 de xullo de 2024 detectábase na proba teórica para obter o permiso de conducir da categoría B no centro de exames do Barco de Valdeorras (onde a Xefatura Provincial de Tráfico de Ourense examina quincenalmente para a obtención dos diferentes permisos de conducir), que un aspirante a permiso da clase B, D. A. U., residente en Tarragona, nacional paquistaní, tiña activado un sistema de comunicación mediante cámara incrustada na súa vestimenta e auricular no seu oído dereito, onde recibía supostamente as respostas ás preguntas teóricas do exame.
Mediante a actuación conxunta de funcionarios da Xefatura e axentes do grupo GIAT do Subsector de Tráfico da Garda Civil (GIAT: Grupo de investigación e análise de Tráfico), procedeuse a tomar declaración ao aspirante e a realizar informe dos dispositivos utilizados.
Como consecuencia de todo o anterior, esta persoa foi declarada NON apto na proba teórica de conducir do permiso B e proposta para expediente sancionador por infracción á Lei de Tráfico, infracción moi grave de 500 euros e 6 meses sen poder presentarse a exame de obtención de permiso en toda España por utilizar dispositivos non autorizados nas probas de obtención de autorizacións administrativas de conducir (infracción moi grave vixente na Lei de Tráfico e seguridade viaria desde a súa última reforma, en vigor desde o 21/03/2022). Non se comete delito ao non haber usurpación de estado civil (o aspirante non se facía pasar por outra persoa).
Fotos: Xefatura Provincial de Tráfico.
