Esta mañá o xerente da Área Sanitaria de Ourense, Verín e Valdeorras, Santiago Camba Bouzas, presentaba en rolda de prensa o balance de actividade e tempos medios de acceso á actividade asistencial programada dos tres hospitais públicos da provincia no ano 2024, período no que logrou reducir a espera media en consultas, cirurxías e probas tanto con respecto ao pasado ano 2023 como, e moi especialmente con respecto ao primeiro semestre de 2024.
Cun total de 21.881 intervencións, o tempo medio de espera a unha intervención programada, foi ao remate de 2024 de 69,5 días de media no conxunto da área, fronte aos 81,8 do primeiro semestre, grazas a un importante esforzo na xestión dos recursos para optimizar e maximizar a capacidade asistencial dos tres hospitais públicos (72,8 días no Hospital Universitario de Ourense, 48 no de Verín e 31 no de Valdeorras, este último cunha das mellores medias de Galicia).
Neste aspecto o xerente destacou a complexidade asociada ao noso perfil poboacional, con especial incidencia en especialidades como oftalmoloxía, cirurxía xeral e do aparello dixestivo e traumatoloxía, cunha gran casuística vencellada ao envellecemento. Mostra delo é que das 21.881 intervencións realizadas en 2024 o 55% dos pacientes tiñan máis de 65 anos, en concreto o 31,1% entre 75 e 90 anos. Con 677 intervencións realizadas a maiores desta idade.
Redución do tempo medio en consultas
En 2024 realizáronse 578.347 consultas nos tres hospitais cun tempo medio de acceso de 86,2 días, case 44 días menos que no período anterior, con 130,1 días ao peche de 2023 e 129,2 no primeiro semestre. Neste aspecto o xerente destacou os esforzo dos profesionais e o incremento das consultas non presenciais (un 6,5%) o que evita, sempre que se pode empregar este modelo, os desprazamentos innecesarios dos pacientes ao hospital.
Esto é posible, subliñou, grazas a “coordinación coa Atención Primaria, mediante teleconsultas entre os profesionais dos centros de saúde e os seus homólogos nos hospitais de referencia, gañando así resolutividade e axilidade. Santiago Camba destacou igualmente o incremento das primeiras consultas: 200.223 en 2024, 5.250 máis que o ano anterior, o que supón un crecemento dun 2,7%.
Por centros os tempos medios de espera en consulta foron, ao peche de 2024, de 87,3 días no de Ourense; 43,2 no de Verín e 112,9 no de Valdeorras, situación puntual derivada dunha carencia de persoal, nas especialidades de Oftalmoloxía e Rehabilitación, que xa se está recuperar grazas ao esforzo e cooperación intercentros dos profesionais de ambos servizos e a incorporación de especialistas.
En 2024 realizáronse 473.569 probas diagnósticas e terapéuticas, tamén neste aspecto cun menor tempo medio de acceso. En concreto Camba Bouzas destacou o “incremento do número de probas realizadas e o impacto positivo do investimento realizado pola Xunta de Galicia en alta tecnoloxía” a modo de exemplo os 1.044 estudos máis realizados en Medicina Nuclear grazas ao novo PET; os 691 procedementos máis realizados na nova sala de Hemodinámica, que supón o 342% de incremento respecto a 2023, o desenvolvemento da Bioloxía Molecular (PCR); ademais dos novos mamógrafos, ou os aceleradores lineais de última xeración, mais precisos e que requiren menor tempo de exposición.
Nesta liña tamén destaca o importante desenvolvemento da cirurxía robótica, que creceu en 2024 ata as 349 intervencións, un 19,2% máis que no ano anterior, e como detallou na súa exposición o xerente se benefician practicamente a todos os pacientes sexa cal sexa a súa idade, e cada vez empregada por máis especialidades.
Acceso prioritario para as patoloxías máis graves
Na súa exposición aos medios o xerente quixo destacar o esforzo constante por manterse nuns tempos mínimos, dacordo co compromiso de resposta rápida as patoloxías graves recollidas no decreto de garantías, garantindo que a “sanidade pública de Ourense mantense moi por debaixo dos tempo máximo de resposta”. Mostra delo é a redución dos tempos medios de acceso ás vías rápidas de sospeita diagnóstica de cancro, en todos os circuitos preferentes existentes, coñecidos como vías rápidas, cunha media de acceso global de 3,5 días, 0.8 menos que en 2023.
As vías rápidas, son unha alternativa de xestión que permiten a avaliación da demanda en función da prioridade clínica, permitindo así dar unha resposta máis áxil e directa, tanto ao diagnóstico como o tratamento daquelas patoloxías máis graves, entre as que se encadran algunhas das oncolóxicas máis frecuentes como colon, endometrio, mama, melanoma, pulmón, cabeza e colo, vexiga e próstata. Cumprindo sobradamente o compromiso de atención antes de un mes, e en Ourense con demora cero en moitos casos.