A Deputación de Ourense acollía esta mañá a constitución da comisión de traballo para a posta en valor da estación de montaña de Manzaneda, cumprindo así co acordo alcanzado no seu momento pola Corporación.
Na reunión, presidida por Luis Menor, tamén participaron como representantes da corporación provincial os deputados Xosé Miguel Pérez Blecua (PP), Aurentino Alonso (PSOE), Bernardo Varela (BNG) e Rafael Martínez (DO), ademais do delegado territorial da Xunta, Manuel Pardo; a alcaldesa da Pobra de Trives, Patricia Domínguez; e o rexedor de Manzaneda, Amable Fernández.
Este grupo de traballo busca implementar melloras na estación de montaña de Manzaneda e aproveitar as súas capacidades. Neste sentido, os asistentes estudaron un documento de traballo que analiza a situación actual da estación e as posibles vías para garantir o seu futuro, máis aló da oferta como estación de esquí no inverno, cunha estratexia de negocio dirixida á desestacionalización e dinamización do complexo, co fin de crear unha nova oferta de actividades de turismo activo, ocio e natureza, ademais de deporte e cultura.
Tras repasar este documento, os integrantes deste grupo de traballo quedaron emprazados a expoñer na vindeira sesión as súas ideas que marquen liñas de mellora na estación de montaña, sistematizando as súas aportacións para que sirvan de base ao plan de futuro desta instalación. Neste senso, o presidente provincial, Luis Menor, valora que “o que quedou claro é a vontade unánime de todos en aplicar melloras que consoliden á estación de montaña de Manzaneda como un referente no que é o valor estratéxico da comarca e da propia provincia, ao ser a única instalación destas características de toda Galicia”.
Débeda cero da Deputación con Meisa
Cabe recordar que en outubro de 2024 o pleno da Deputación aprobou unha modificación de crédito que incluía unha partida de 1,5 millóns de euros para pechar a débeda coa sociedade Meisa, de tal xeito que, como se está a facer agora, podan centrarse os esforzos na mellora e competitividade deste espazo natural e de ocio, favorecendo a desestacionalización da actividade máis aló da súa condición orixinal como estación de esquí.