Dada a magnitude dos incendios forestais que neste verán afectaron a toda España e de forma especial a provincias como Ourense ou León, os medios estanse facendo eco da visita que, segundo un comunicado feito público pola Casa Real, os Reis Don Felipe VI e Dona Letizia realizarán na vindeira semana ás principais zonas afectadas, devastadas en moitos casos polo lume.
A visita dos monarcas ten como obxectivo coñecer o alcance dos danos provocados polos incendios que levan arrasadas miles de hectáreas, así como as necesidades máis urxentes dos afectados por esta traxedia.
Segundo informaba o venres a Casa Real, a axenda concreta aínda non se pechara pero “Don Felipe e Dona Letizia queren coñecer de primeira man os danos sufridos e as necesidades dos veciños afectados, así como amosar o seu agradecemento a todos os equipos que contribuíron a combater o lume e protexer á poboación”.
Fotos: Carlos G. Hervella.