O presidente de Cáritas Española, Manuel Bretón, visitaba a comezos desta semana algunhas das zonas máis afectadas polos recentes incendios forestais nas dióceses de Astorga e León. O obxectivo da viaxe era coñecer de primeira man os danos ocasionados e escoitar os testemuños dos veciños que sofren as consecuencias dunhas perdas que van moito máis alá do material.
Percorreron desde a zona da Maragatería en Palacios de Jamuz ou Quintana e Congosto, ata a comarca de Valdeorras na zona ourensá, ou a contorna de Picos de Europa en León, territorios que se corresponden ademais cos correspondentes ás dioceses de Astorga e León, polo que nas visitas estiveron acompañados tamén polo polo bispo de León, Luis Ángel das Heras, o administrador diocesano de Astorga, Francisco Javier Gai, así como dos equipos directivos de Cáritas Astorga e León, e párrocos das contornas devastados.
Durante o seu percorrido pola Diócese de Astorga o luns, desde a Maragatería ata a comarca de Valdeorras, o presidente de Cáritas Española puido observar os graves danos e falar cos veciños afectados. En Quintana e Congosto (León) reuniuse cos habitantes do pobo, que aínda se recuperan da tráxica perda de Abel Ramos e Jaime Aparicio, dous mozos da localidade que morreron tentando frear o lume. O incendio non só deixou feridos e casas destruídas, senón que tamén obrigou a evacuar aos veciños a Astorga, onde foron acollidos por Cáritas Astorga no Seminario.
O dobre duelo
Na provincia de Ourense, a visita a Valdeorras revelou un panorama igualmente desolador. En localidades como Fervenza e Cesures, o lume calcinou algunhas vivendas e dúas igrexas. En San Vicente de Leira, o 80% das casas foron pasto das chamas. Os veciños, abatidos, relataron como o lume parecía caer “como bombas” sobre os seus fogares, obrigándoos a fuxir no último momento. Unha das residentes describiu a dor como un “dobre duelo” ao perder a casa familiar chea de recordos dos seus seres queridos.
Bretón destacou que, tras comprobar a magnitude da catástrofe, Cáritas continuará apoiando aos afectados, como xa o fixo co volcán da Palma e a DANA. “Os nosos voluntarios e traballadores estiveron aí desde o primeiro momento, e seguiremos acompañando ás persoas”, recalcou. A directora de Cáritas Diocesana de Astorga, Inmaculada do Peso, subliñou a importancia de non perder o contacto coas persoas afectadas. Para Cáritas, “é crucial facerse presentes para escoitar e acompañar a quen o perda todo”.
Fotos cedidas.
