O subdelegado do Goberno en Ourense, Eladio Santos, animou hoxe ás persoas desempregadas do rural a sumarse aos cursos formativos do Proxecto CARES, que busca facer produtivo o monte durante todo o ano. Fíxoo durante unha reunión na que os membros da consultora Foresin Erika Martínez e Roberto Cabo presentaron a iniciativa aos alcaldes do Barco de Valdeorras, Aurentino Alonso, e Vilar de Barrio, Manuel Conde, e ás alcaldesas de Castro Caldelas, Sara Inés Vega, e Vilardevós, Eva Pérez.
CARES recibiu 1,6 millóns de euros de financiamento da Fundación Biodiversidade do Ministerio para a Transición Ecolóxica e o Reto Demográfico (MITECO) no marco do Plan de Recuperación, Transformación e Resiliencia (PRTR), con fondos NextGenerationEU. O obxectivo deste proxecto é fomentar o aproveitamento da resina e a castaña no noroeste peninsular (Galicia, Asturias e norte de León). “Esta iniciativa innovadora é unha aposta polo rural e pola xeración de emprego, dunha forma respectuosa cos montes e que pode previr unha vaga de lumes como a que vivimos en Ourense”, indicou o subdelegado.
Os integrantes do proxecto Erika Martínez e Roberto Cabo explicaron aos alcaldes e alcaldesas interesados na proposta que a primeira fase do estudo consistiu en identificar as áreas de Galicia con maior potencial para implementar os modelos técnico-económicos sobre resina e castaña, concluíndo que a maioría se atopan na provincia de Ourense. “A idea é fomentar un emprego do sector primario que sexa rendible e permita á xente quedar a vivir no rural, por iso, combínanse estes dous aproveitamentos: a castaña trabállase no outono e a resina, na primavera e no verán”, explicou.
O proxecto comezou en febreiro de 2024 e agora entra na fase formativa, na que se precisa a involucración de concellos nos que haxa condicións óptimas para explotar a resina e a castaña, de forma que imparta a formación no lugar no que se vaia a realizar a actividade profesional. Por iso, os alcaldes e alcaldesas do Barco de Valdeorras, Castro Caldelas, Vilar de Barrio e Vilardevós comprometéronse a ofertar a formación nos seus municipios e a buscar persoas que queiran traballar no sector (entre 12 e 15 por curso). Primeiro haberá reunións informativas en cada un dos concellos para logo realizar os cursos entre o 15 de outubro e o 15 de novembro. “O obxectivo é ofrecer formación de calidade que realmente chegue a persoas interesadas en dedicarse activamente a estas actividades”, apuntou Eladio Santos.
O consorcio do proxecto CARES está formado pola Fundación CETEMAS (coordinadora do proxecto), a Fundación Cesefor, o grupo de investigación PROePLA da Universidade de Santiago de Compostela (USC), PEFC España e a asociación de propietarios Juntas de Montes de Asturias (JUMA). “Os impulsores e impulsoras da iniciativa levan un ano e medio traballando para lograr unha nova actividade que aproveite os montes e fixe poboación no rural e por iso contan co apoio do Goberno de España, comprometido totalmente co reto demográfico”, subliñou o subdelegado, que agradeceu a implicación dos alcaldes e alcaldesas presentes na reunión.