A tradición do Entroido na zona sur da provincia de Pontevedra será o eixo dunha mesa redonda que está prevista para o vindeiro 8 de novembro no Centro Social do Mar de Bueu (rúa Montero Ríos) a partir das 12h.
Nela afondarase sobre as figuras petitorias, co fin de dalas a coñecer e poñelas en valor, de tres Entroidos pontevedreses: os Currumiños de Mos, dos que falará Ismael Pato; os Vascalleiros de Bueu da man de José Manuel Dopazo e as Perriñas e Mudados de Ribadetea (Ponteareas). A mesa redonda estará moderada por Hadrián Román.
A outra parte da xornada será unha interesante saída, ás 16:30h., das figuras de Entroido de diferentes puntos da provincia de Pontevedra polas rúas de Bueu: dende o Centro Social do Mar ata a carpa dos Xardíns Urbano Lugrís.