A experta internacional en viños, Beth Willard volvía percorrer nesta semana boa parte do territorio vitícola da valdeorrés, para coñecer máis profundamente os seus viños e as características dos viñedos da Denominación de Orixe. Durante dous días, xoves 27 e venres 28 de novembro, visitaba as instalacións de 14 adegas, onde cataba as súas principais referencias, e coñecía novos proxectos sobre o terreo.
Ademais realizaba unha cata final na sede do Consello Regulador, cunha seleción de 54 referencias de viños brancos e tintos, do resto de adegas asociadas á D.O. Willard considera que “cada vez hai máis viños que falan dunha zona ou dunha parcela, ou incluso expresan o estilo dun enólogo”, algo que considera moi interesante porque “existen moitas diferenzas entre as distintas partes de Valdeorras, e para min é o que sabe máis nos viños”.
Así mesmo esta experta di que “a godello é unha variedade moi nobre que se pode disfrutar moi xove, pero tamén son viños que teñen bo envellecemento; sería estupendo se, co tempo, puidéramos beber máis viños en botella de anada antiga”. Willard resalta tamén que “en Valdeorras, podemos atopar algúns dos mellores viños brancos de España, pero tamén, tintos con moito carácter e personalidade”.
Tras a visita do ano pasado, nesta ocasión “plantexouse como un seguimento para ver a evolución dos viños”, explicou Jorge Mazaira, director técnico da D.O. Valdeorras. “Trátase de poder observar a súa traxectoria, e con ela, a da propia denominación de orixe, polo que seguramente as súas visitas se sigan repetindo”.
As conclusións do informe que a experta en viños prepare, a partires da información recibida en Valdeorras, formarán parte da publicación do Master of Wine Tim Atkin. Nel, Willard falará da variedade godello, á que augura un gran futuro porque “ten a capacidade de producir viños que están entre os mellores a nivel internacional; gustaríame presentar esta cara de Valdeorras ao resto do mundo”.
Ademais de escribir na revista Decanter, Willard é tamén co-presidenta dos premios desta publicación, os Decanter World Wine Awards, e membro da Gran Orde de Cabaleiros do Viño. Tamén realiza regularmente, presentacións e catas de viños españois.