Os deputados ourensáns do PP Celso Delgado, Ana Vázquez e Rosa Quintana e os seus homólogos lucenses Francisco Conde, Jaime de Olano e Cristina Abades, rexistraron o pasado 25 de marzo de 2025 varias preguntas dirixidas ao Goberno sobre asuntos ferroviarios relativos ao tramo Covas-Monforte de Lemos, dun 85 km de lonxitude, que forma parte do Corredor Atlántico ferroviario, no traxecto Vigo-Ourense-Monforte de Lemos-Valdeorras-Ponferrada- León.
Estes parlamentarios amosan a súa preocupación “polos importantes atrasos que acumula a redacción dos proxectos de mellora, en caso necesario, de desmontes, terrapléns, pontes, túneles e obras de drenaxe, así como a renovación de elementos de vía neste tramos entre Monforte de Lemos e Covas”. E cren que “será imposible que Adif licite en 2026 as obras e que en consecuencia poida cumprirse o compromiso coa Comisión Europea de finalizar a rede básica do Corredor Atlántico antes do 31 de decembro de 2030”.
Neste senso, presentaron as seguintes preguntas ao Goberno:
“Finalizou xa a execución por parte da empresa adxudicataria dos traballos contratados en xaneiro de 2022 por ADIF destinados á rehabilitación do cable de enerxía de 2.200 V no tramo Covas-Monforte de Lemos, pertencente á liña 800 A Coruña-León? En que data?
En cantos meses superou a empresa adxudicataria o prazo de doce meses que figura estipulado no contrato formalizado por Adif? Que razóns xustificaron a enorme demora na súa concusión?
Cal foi a contía (IVE incluído) finalmente abonada por Adif á empresa adxudicataria como consecuencia deste contrato?“