Coma sempre era grande a expectación creada arredor da velada de MMA que regresaba neste mes de abril ao Barco de Valdeorras, e non defraudou.
Con grandes colas pouco antes da hora de inicio, o espectáculo de artes marciais mixtas arrincaba ás 20:30 horas do sábado 18 de abril no pavillón velllo e remataba xa entrada a noite, tras oito intensos combates amateur de 3X3, os tres últimos protagonizados por loitadores da casa: Eder Rodríguez, Alejandro Menéndez e Felipe Morales.
O primeiro combate (82 kg), entre Ánder Paz (Graíño Team A Coruña) e Tomás Nogueira (Sori Portugal) era para o portugués por finalización; o segundo (68 kg) entre Fernando Zas (Graíño Team A Coruña) e Sergio Barbanza (MMA Asturias), era para o coruñés por decisión dividida; e o terceiro (72 kg), entre Mustapha Cham (Graíño Team A Coruña) e Pedro Martins (MMA Sori Portugal) resolvíase cunha parada vital por decisión médica.
O dous seguintes combates remataban por decisión. O cuarto (61 kg), entre Gallito (Climent Club Santiago de Compostela) e Leonardo Martins (Centro Deportivo Tibet Xixón) era para Gallito; e o quinto (72 kg), entre Imran Boukchabe (Graíño Team Ribeira) e Henrique Plasencia (Sori Portugal) era para o portugués.
E xa na recta final, a única vitoria local era a de Alejandro Menéndez (Graíño Team O Barco) que vencía por KO Técnico ao asturiano Felyouni (Centro Deportivo Tíbet Xixón) no sétimo combate (63 kg). No sexto combate (71 kg), Eder Rodríguez (Graíño Team O Barco) perdía por KO Técnico ante Milton Agustín (Climent Club Santiago de Compostela); e no último, o oitavo (74 kg), Felipe Morales (Graíño Team O Barco) perdía contra Sergio Piñón por finalización.
Fotos: Carlos G. Hervella.