Tanto teóricos como prácticos eran os diversos contidos do “Curso de perfeccionamento apícola”, que se desenvolvía ao longo da xornada do 16 de maio na Rúa. Estaba promovido dende a Asociación Valdeorresa de Apicultores e dende a Agrupación Apícola de Galicia, e dirixido aos seus asociados.
Comezaba ás 10h. cunha sesión teórica, na que se tocaban cuestións como a bioloxía da abella melífera e conceptos evolutivos, calendario e manexo do colmear e conceptos xerais de sanidade e tratamento contra a varroa. Xa pola tarde, en campo, tiña lugar outra parte práctica, dende as 16h., dedicada a inspección, lectura e manexo xeral de colmeas.
A formación estaba impartida por Rubén Fernández, biólogo e apicultor profesional, ademais de técnico da Agrupación Apícola de Galicia.
“Resultou un Curso moi interesante, oportuno e necesario”, comentaba o presidente da Asociación Valdeorresa de Apicultores, Armando Rodríguez, quen ademais comentaba que “encontramos moita falta de alimento nas colmeas a consecuencia do mal tempo. Están sen alimento e temos que axudalas”.
Fotos cedidas.
