O Diario Oficial de Galicia publica hoxe a resolución pola que se determinan os períodos hábiles de caza, as especies sobre as que se poderá exercer, os métodos autorizados para a súa práctica e as limitacións particulares que afectarán ao exercicio da actividade cinexética na Comunidade durante a tempada 2026-2027.
Deste xeito, segundo establece a resolución publicada hoxe, a nova tempada de caza arrancará en Galicia o 18 de outubro e estenderase ata o 6 de xaneiro do vindeiro ano, con carácter xeral e permitirase o exercicio desta actividade os xoves, os domingos e os festivos de carácter estatal ou autonómico.
En concreto, no que respecta ao xabaril, no réxime cinexético común o período xeral de caza abranguerá do 15 ao 31 de agosto deste ano e do 7 de xaneiro ao 28 de febreiro de 2027, os xoves, sábados, domingos e festivos; e do 1 de setembro de 2026 ao 5 de xaneiro do vindeiro ano os sábados, nas modalidade de batida, montaría e espera. Así mesmo, no réxime cinexético especial (RCE) a tempada irá do 15 de agosto ao 28 de febreiro de 2027, os xoves, sábados, domingos e festivos nas modalidades de batida, montaría e espera. Ademais, co fin de reforzar o control desta especie no contexto actual, poderase cazar xabarís nos axexos de corzo que se realicen en terreos en réxime cinexético especial entre o 1 de abril e o 31 de xullo de 2027, sen descontar da cota de capturas que teñan aprobados os tecores para a tempada 2026-2027. A maiores, tamén se poderá cazar xabaril na modalidade en man os luns, martes, mércores e venres desde o 15 de agosto de 2026 ata o 28 de febreiro de 2027.
En canto ao corzo, os machos adultos poderán capturarse en terreos en réxime cinexético común entre o 15 de agosto e o 17 de outubro, os sábados en batida/montaría, e todos os días da semana na modalidade de axexo. En terreos en réxime cinexético especial, o período xeral abranguerá do 15 de agosto ata o 17 de outubro -todos os días da semana na modalidade de axexo e os sábados, domingos e festivos na de batida/montaría-, podendo cazarse tamén en axexo todos os días da semana desde o 1 de abril ata o 31 de xullo de 2027. As femias adultas de corzo permanecen vedadas con carácter xeral, permitíndose a súa caza puntual por danos e tamén nos tecores se está tecnicamente xustificada de acordo coa situación real da poboación en cada tecor, podendo escollerse entre dous períodos: do 5 de setembro ao 17 de outubro de 2026 ou do 7 de xaneiro ao 13 de febreiro de 2027.
Para o cervo, o gamo e o muflón, en réxime cinexético especial, o período xeral abranguerá do 13 de setembro ao 17 de outubro deste ano na modalidade de axexo todos os días da semana, podendo cazarse con todas as modalidades os xoves, sábados, domingos e festivos -e en axexo calquera día- desde o 18 de outubro ata o 5 de xaneiro do vindeiro ano.
Caza menor
Para as distintas especies de caza menor, no caso da arcea, o período hábil xeral irá tamén do 18 de outubro ao 6 de xaneiro do ano que vén -aínda que poderá ampliarse ata o 7 de febreiro en terreos de réxime cinexético especial que o soliciten- os xoves, domingos e festivos. Para a lebre, a tempada estenderase do 18 de outubro ao 29 de novembro de 2026 os xoves, domingos e festivos en terreos de RCE.
No referente ao paspallás e ao pombo torcaz, a tempada coincidirá co período hábil xeral, a excepción da media veda nos tecores da Antiga Lagoa de Antela, que se establece entre o 22 de agosto e o 13 de setembro, os sábados e domingos.
No que atinxe ao raposo, no período hábil de caza menor poderase cazar nas distintas modalidades de caza menor e en batida. Poderanse autorizar batidas para a caza do raposo desde o 3 de setembro ata o 17 de outubro de 2026, e desde o 7 de xaneiro ata o 7 de febreiro de 2027, os xoves, sábados, domingos e festivos, en todo o territorio da Comunidade Autónoma de Galicia.
Ademais, no caso das aves, establécese a veda de charrela, rula turca, pato cullerete, gaivota escura, gaivota arxéntea, gaivota patiamarela, pomba brava, pomba zura e gralla cereixeira; mentres que outras aves de caza menor se rexerán polo período hábil xeral.
A resolución publicada hoxe no DOG tamén establece cuestión relacionadas co adestramento de cans e aves de cetraría.