Entre risas nerviosas e tamén cómplice, ilusionados e con certa tranquilidade pero sobre todo con ganas de que pasen. Así se presentaban na mañá deste martes 2 de xuño, os 124 estudantes dos institutos do Barco de Valdeorras (IES Lauro Olmo con 25 e IES Martaguisela con 43); da Rúa (IES Cosme López Rodríguez con 12 e Pablo VI con 8); do IES Xermán Ancochea Quevedo da Pobra de Trives con 12; do IES Carlos Casares de Viana do Bolo con 12; e do IES de Quiroga con 12 que comezan no instituto da Rúa, os exames da PAU (Proba de Acceso á Universidade que tradicionalmente coñecemos como Selectividade) 2026 que se celebrarán ata o xoves 4 de xuño.
A primeira xornada arrancaba no IES Cosme López Rodríguez ás 9 horas coa presentación. Coma sempre para a realización das probas, o instituto rues habilitou dúas aulas contiguas. Nunha examínanse os alumnos dos dous centros do Barco e os dous da Rúa; e na outra os de Quiroga, Viana do Bolo e A Pobra de Trives.
Na mañá desta primeira xornada de apertura serán os exames de Lingua Castelá e Literatura II; Historia de España e Historia da Filosofía. Pola tarde será a quenda de Xeoloxía; e Ciencias Ambientais; Matemáticas Aplicadas ás CC Sociais II; Técnicas de Expresión Gráfico-Plástica; Movementos Culturais e Artísticos; Debuxo Técnico II; Segunda Lingua Estranxeira; e Historia da Música e da Danza.
Fotos: Mónica G. Bellver.
