Novo accidente de tráfico mortal na provincia. Na mañá deste venres 12 de xuño falecía un motorista tras verse implicado nun accidente de tráfico cunha furgoneta na autovía A-52, ao seu paso polo concello de Carballeda de Avia, tal como informan dende o 112 Galicia.
O sinistro producíase arredor das 07:45 horas, á altura do punto quilométrico 255, sendo o propio condutor da furgoneta quen contactou co 112 Galicia para informar de que “acababa de sufrir unha colisión cunha motocicleta. Pouco despois, indicou a posibilidade de que o motorista estivese falecido”.
Nada máis recibir o aviso, desde o Centro Integrado de Atención ás Emerxencias 112 Galicia informaban ao Servizo de Urxencias Sanitarias de Galicia-061, que mobilizou inicialmente o helicóptero medicalizado con base en Ourense. Tamén alertaban aos Bombeiros do Carballiño, o GES de Ribadavia e a Garda Civil de Tráfico.
“Unha vez no lugar, os servizos de emerxencia só puideron confirmar o falecemento do motorista”, lamentan dende o 112.