Na madrugada deste sábado 13 de xuño, cinco persoas resultaban feridas por mor dunha colisión entre dous turismos. Segundo a información recollida no 112 Galicia, “o sinistro produciuse preto das dúas na OU-402, en Barral”.
O primeiro aviso sobre o sinistro chegaba ao Centro Integrado de Atención ás Emerxencias de Galicia “mediante as chamadas de alertadores, pero tamén a través dun sistema automático dun teléfono móbil, que permitiu a comunicación coas persoas implicadas”, indican dende o 112, explicando que “aínda que todas estaban liberadas e accesibles, presentaban lesións de diversa consideración e foron trasladadas por Urxencias Sanitarias de Galicia-061. En total, cinco persoas resultaron feridas neste accidente”.
Alén de sanitarios, no operativo de asistencia participaron os axentes da Garda Civil de Tráfico, os membros do GES de Ribadavia e os voluntarios de Protección Civil de Castrelo de Miño.