Na madrugada deste xoves 23 de xullo unha persoa tiña que ser trasladada por inhalación de fume logo dun incendio nunha cociña en Barbadás. Tal como indican dende o 112 Galicia o suceso tiña lugar nunha vivenda situada no Camiño da Pista a San Benito, en Piñor sobre as 3:15 horas. “As lapas queimaron unha cociña por completo e deixaron unha persoa trasladada por inhalación de fume ao CHUO”, puntualizan.
Un dos ocupantes da vivenda explicaba ao 112 que “saía moito fume, pero non podía confirmar o que ardía”. Na planta superior da vivenda quedaba unha persoa que incapaz de saír polos seus propios medios, polo que desde o Centro Integrado de Atención ás Emerxencias actibaban un operativo no que participaron Urxencias Sanitarias de Galicia-061, a Garda Civil e os Bombeiros do Polígono de San Cibrao das Viñas. Tamén se informou ao GES do Pereiro de Aguiar.
“Á súa chegada, os bombeiros sacaron á persoa da vivenda e solicitaron asistencia sanitaria para ela por inhalación de fume, sendo evacuada ao Complexo Hospitalario Universitario de Ourense”, conclúen.