A Confederación Empresarial de Ourense (CEO), que preside David Martínez, ten previsto celebrar a súa próxima xunta directiva na comarca de Valdeorras o vindeiro 25 de setembro. Será unha xornada que incluirá outros actos no programa como visitas a empresas e un xantar institucional.
Trátase da segunda ocasión este ano en que esta reunión sae da sede empresarial para realizarse en colaboración cunha asociación integrada, neste caso coa Asociación Empresarial de Valdeorras (Aeva), cun dobre obxectivo: “achegar a xestión e a toma de decisións da organización ao conxunto da provincia, e recoñecer e visibilizar o labor das asociacións territoriais que integran a CEO, alén de fomentar o coñecemento máis directo da realidade empresarial de cada comarca”, segundo a organización empresarial.
A xunta directiva levarase a cabo en formato en liña e de xeito presencial no complexo hostaleiro Paladium de Vilamartín de Valdeorras, a partir das 13.30h. e contará con clausúraa por parte de Ángela de Miguel, presidenta de Cepyme. Previamente realizaranse dúas visitas a Piscilor S.A. situada en Quiroga, e á estación de Iberdrola en Valencia do Sil.